ప.పూ. సర్‌సంఘ్‌చాలక్ విజయదశమి ఉత్సవ ప్రసంగం - భాగం 6

 

 

ఇంట్లో తయారు చేయగలిగేవాటిని బయటి నుండి దిగుమతి చెయ్యవద్దు. మన దేశంలోనే వీలైనంత ఎక్కువ ఉద్యోగితను కల్పించాలి. దేశంలో తయారు చేయగలిగినవాటిని బయటి నుంచి దిగుమతి చేసుకోవద్దు. మన దేశంలో తయారుకానివాటి విషయంలో అవి లేకుండానే పని జరిగేలా చూసుకోవాలి. ప్రత్యామ్నాయం లేని, జీవనావశ్యకమైనటువంటివాటిని మాత్రమే బయటి దేశాల నుండి తీసుకురావచ్చు. మన వేషభాషలు, ఆహార విహారాలు మన వారసత్వమై ఉండాలి. అదే స్వదేశీ ప్రవర్తన అని గుర్తుంచుకోండి. క్లుప్తంగా చెప్పాలంటే ఇదే స్వదేశీ ఆచరణ.

 

 

శాంతికి శీలసంపదతో కూడిన శక్తి ఆధారం అవుతుంది. దుష్టులు స్వార్థపూరిత కారణాలతో ఏకమవుతారు. శక్తి మాత్రమే వారిని నియంత్రించగలదు. మంచివారికి అందరిపట్లా సద్భావన ఉంటుంది కానీ ఎలా కలిసి ఐక్యతతో మెలగడం తెలియదు. అందుకే వారు బలహీనులుగా కనిపిస్తారు. ఈ వ్యవస్థీకృత సామర్థ్యాన్ని నిర్మించే కళను వారు నేర్చుకోవాలి. రాష్ట్రీయ స్వయంసేవక్ సంఘ్ అనేది హిందూ సమాజంలో ఈ శీలసంపన్న శక్తి సాధనకు పెట్టింది పేరు. ఈ ఉపన్యాసం ప్రారంభంలో చెప్పిన ఐదు ఉత్తమ నడవడికల ఆధారంగా సమాజంలోని మంచివారిని అనుసంధానం చేయాలని సంఘ్ వాలంటీర్లు యోచిస్తున్నారు.

 

 

ఆధునిక ప్రపంచపు పోకడ ఏమిటంటే... అది సత్యాన్ని దాని స్వంత విలువతో అంగీకరించదు. జగత్తు శక్తిని అంగీకరిస్తుంది. భారతదేశపు అభివృద్ధితో అంతర్జాతీయ లావాదేవీలలో సద్భావన - సమతుల్యత ఏర్పడుతాయని, ప్రపంచం శాంతిసౌభ్రాతృత్వాల వైపు వెళుతుందని అన్ని దేశాలకూ తెలుసు. అయినప్పటికీ, వారి సంకుచిత స్వార్థం, అహం లేదా దురుద్దేశం కారణంగా భారతదేశాన్ని పరిమితుల్లో బంధించేందుకు శక్తివంతమైన దేశాలు చేస్తున్న ప్రయత్నాలను మనమందరం అనుభవిస్తున్నాము. భారత్ యొక్క శక్తి పెరుగుతున్న కొద్దీ, భారత్‌ను మరింతగా అంగీకరిస్తారు. ప్రపంచం బలహీనులను లెక్క చెయ్యదు, బలవంతులను ఆరాధిస్తుంది.