ఆయుష్మాన్ భారత్లో భారీ మోసం..300 పైగా నకిలీ ఐడీలు
Total Views |
కేంద్ర ప్రభుత్వం ప్రతిష్టాత్మకంగా అమలు చేస్తున్నఆయుష్మాన్ భారత్ యజన పథకంలో మోసాలు చోటుచేసుకుంటున్నాయి. కొంతమంది అక్రమార్కులు సొమ్ము చేసుకునేందుకు ప్రయత్నిస్తున్నారు. తాజాగా ఉత్తరప్రదేశ్, పంజాబ్ రాష్ట్రాల్లో భారీగా నకిలీ ఆయుష్మాన్ కార్డులను తయారుచేస్తున్న ఒక పెద్ద నెట్వర్క్ను పోలీసులు , నేషనల్ హెల్త్ అథారిటీ (NHA) సంయుక్తంగా కనుగొంది. వారు జరిపిన దాడుల్లో భాగంగా 300కు పైగా నకిలీ ఆయుష్మాన్ భారత్ ఐడీలు (కార్డులు), వాటిని తయారు చేయడానికి ఉపయోగించిన పరికరాలు, కంప్యూటర్లు, నకిలీ పత్రాలను అధికారులు స్వాధీనం చేసుకున్నారు. ఈ ముఠా ఆర్థికంగా బలహీన వర్గాల ప్రజలను లక్ష్యంగా చేసుకుని, వారికి తప్పుడు వివరాలతో నకిలీ ఆయుష్మాన్ కార్డులను తయారు చేసి, ఒక్కో కార్డుకు పెద్ద మొత్తంలో డబ్బు వసూలు చేస్తున్నట్లు ప్రాథమిక విచారణలో తేలింది.
ఈ కుంభకోణంపై కేంద్ర ఆరోగ్య మంత్రిత్వ శాఖ, NHA తీవ్రంగా స్పందించాయి. దేశవ్యాప్తంగా నకిలీ కార్డుల తయారీ పంపిణీపై నిఘా పెంచాలని అన్ని రాష్ట్రాల ఆరోగ్య శాఖలను ఆదేశించారు. ఈ నెట్వర్క్లో పాలుపంచుకున్న కొందరిని ఇప్పటికే పోలీసులు అరెస్ట్ చేశారు. వారి నుంచి మరిన్ని కీలక వివరాలను రాబట్టేందుకు విచారణ కొనసాగుతోంది. ఆయుష్మాన్ భారత్ వ్యవస్థలో నకిలీ ఐడీలను గుర్తించేందుకు సాంకేతిక నిఘాను మరింత కఠినతరం చేయాలని NHA నిర్ణయించింది. ఈ పథకానికి సంబంధించిన కార్డులను కేవలం ప్రభుత్వ అధీకృత కేంద్రాల ద్వారా మాత్రమే పొందాలని, అనధికార వ్యక్తులను నమ్మి మోసపోవద్దని అధికారులు హెచ్చరించారు.