జంతువుల మందును పిల్లల మందుగా మార్చేసి విక్రయిస్తున్న సాజిద్ అరెస్ట్

 

 

సూరత్ : ప్రజల ఆరోగ్యంపై ప్రభావం చూపే ఓ దిగ్భ్రాంతికరమైన ఘటన వెలుగులోకి వచ్చింది. జంతువుల కోసం ఉద్దేశించిన టానిక్ ను, మళ్లీ ప్యాక్ చేసి, దానిని పిల్లలకు మందుగా అధిక ధరకు విక్రయిస్తున్న మెడికల్ షాప్ యజమానిని అరెస్ట్ చేశారు.

 

సూరత్‌లోని గోపిపుర ప్రాంతంలో ఉన్న ఒక మెడికల్ స్టోర్‌పై సూరత్ స్పెషల్ ఆపరేషన్ గ్రూప్ (SOG) బృందం దాడి చేసి, దాని యజమాని మహమ్మద్ సాజిద్ ఇబ్రహీం ముల్లా (51)ను అరెస్టు చేసినట్లు డిప్యూటీ కమిషనర్ ఆఫ్ పోలీస్ (DCP) రాజ్‌దీప్‌సిన్హ్ నకుమ్ ప్రకటించారు.జంతువుల కోసం ఉద్దేశించిన హిమాలయా లివ్.52 ప్రోటెక్ లిక్విడ్ వెటర్నరీ ఫీడ్ సప్లిమెంట్ పెద్ద డబ్బాలను నిందితులు తీసుకుని, ఆ ద్రవాన్ని 60 ఎంఎల్ మరియు 100 ఎంఎల్ చిన్న సీసాలలోకి మార్చారని, ఆ తర్వాత దానినే పిల్లల మందుగా చెలామణి చేసేందుకు హిమాలయ లివ్.52 డ్రాప్స్' అనే పేరుతో ఉన్న నకిలీ లేబుళ్లను సీసాలపై అతికించినట్లు తెలిపారు.

 

"అతను 'హిమాలయ లివ్.52 ప్రొటెక్ లిక్విడ్ వెటర్నరీ ఫీడ్ సప్లిమెంట్' (Himalaya Liv.52 Protec Liquid Veterinary Feed Supplement) ఉన్న పెద్ద ఒక లీటరు మరియు ఐదు లీటర్ల డబ్బాల నుండి ద్రవాన్ని తీసి, దానిని 60 మి.లీ మరియు 100 మి.లీ సీసాలలో నింపేవాడు. ఆ తర్వాత, ఆ సీసాలపై 'హిమాలయ లివ్.52 డ్రాప్స్' (పిల్లల కోసం ఉపయోగించే ఉత్పత్తి)కు సంబంధించిన నకిలీ లేబుళ్లను అతికించేవాడు" అని డీసీపీ తెలిపారు.నిందితుడు ఆ వస్తువును దాని అసలు ధర కంటే రెట్టింపు ధరకు విక్రయించేవాడని, ఈ ఆపరేషన్ సమయంలో రూ. 31,195 విలువైన సామగ్రిని, ఇతర వస్తువులను పోలీసులు స్వాధీనం చేసుకున్నారని ఆయన తెలిపారు.ఈ నేపథ్యంలో సాజిద్ ఇబ్రహీంపై భారతీయ న్యాయ సంహితలోని సెక్షన్లు 123, 125, 336, 278 కింద పోలీసులు కేసులు నమోదు చేశారు.