దీపావళి వేడుకలకు అమెరికాలో అంతరాయాలు.. హిందువులకు వ్యతిరేకంగా నినాదాలు
Total Views |
అమెరికాలో హిందువులు దీపావళి పండగ జరుపుకుంటున్న సమయంలో ట్రంప్ మద్దతు దారులు ప్రవేశించి, తీవ్ర అంతరాయం కలిగించారు. అంతేకాకుండా హిందువులకు, భారతీయులకు వ్యతిరేకంగా నినాదాలు కూడా చేశారు. ‘భారతీయులందరినీ దేశం నుంచి బహిష్కరించాలి’, ‘హిందువులు క్రైస్తవులను భర్తీ చేస్తున్నారు’ అంటూ రాసి ఉన్న ప్లకార్డులను ప్రదర్శించారు. సోషల్ మీడియాలో కూడా వైరల్ అయ్యాయి.
భారతీయులకు వ్యతిరేకంగా నినాదాలు చేసిన వారిలో జాక్ లాంగ్ అనే వ్యక్తిని ట్రంప్ మద్దతుదారుడిగా గుర్తించారు. దీపావళి వేడుకల నుంచి బయటకు పంపించిన తర్వాత కూడా అతడు హిందువులపై ఆరోపణలు చేస్తూనే ఉన్నాడు. టెక్సాస్‌లో డెమోక్రటిక్ పార్టీ విజయం సాధించడానికి హిందువులే సహకరించారని వ్యాఖ్యానించాడు.
అతివాద కార్యకర్త జేక్ లాంగ్, అతని సహచర కార్యకర్త థామస్ అలెన్ నాయకత్వంలో నిరసనకారులు, సియాటిల్ సెంటర్ ఆర్మరీలో జరుగుతున్న వేడుకల్లోకి దూసుకెళ్లారు. అక్కడ ఒక నృత్య ప్రదర్శన జరుగుతుండగా వారు అక్కడికి చేరుకున్నారు. వారు అమెరికా జెండాలతో పాటు, “డాట్ హెడ్స్ అందరినీ బహిష్కరించండి”, “క్రైస్తవుల స్థానంలో హిందువుల రాకను ఆపండి” వంటి నినాదాలు ఉన్న ప్లకార్డులను ప్రదర్శించారు. ఈ అంతరాయం వీడియోలలో రికార్డ్ చేయడంతో ఆ తర్వాత సోషల్ మీడియాలో వైరల్ అయ్యాయి.
అయితే ఈ నిరసనకారులు దీపావళి వేడుకలనే తమ ఆందోళనకు వేదికగా చేసుకోవడం అక్కడి భారతీయులను ఆగ్రహానికి గురిచేసింది. ఆ సమయంలో చిన్నారులు సాంస్కృతిక కార్యక్రమాలు ప్రదర్శిస్తున్నారు. అలాంటి సమయంలో నిరసనకారులు నినాదాలు చేయడంతో వేడుకలకు హాజరైన భారతీయులు వారిని తీవ్రంగా వ్యతిరేకించారు.
సియాటెల్ ఘటనపై ఉత్తర అమెరికా హిందువుల కూటమి (Coalition of Hindus of North America – CoHNA) ఆందోళన వ్యక్తం చేసింది. చిన్నారులు సాంస్కృతిక కార్యక్రమాలు నిర్వహిస్తున్న సమయంలో జాక్ లాంగ్, థామస్ అలెన్ అనే ఇద్దరు వ్యక్తులు అక్కడికి వచ్చారని వెల్లడించింది.
వారు భారతీయులు, హిందువులకు వ్యతిరేకంగా నినాదాలు రాసి ఉన్న ప్లకార్డులను ప్రదర్శించినట్లు తెలిపింది. సియాటెల్‌తో పాటు చుట్టుపక్కల ప్రాంతాల్లో నివసించే హిందువులు అప్రమత్తంగా ఉండాలని సూచించింది. ఇతర దీపావళి వేడుకలకు కూడా వెళ్లి నిరసనలు చేపడతామని వారు ప్రకటించినట్లు వెల్లడించింది.
ఖండించిన భారతీయ అమెరికా ప్రతినిధులు
అమెరికా కాంగ్రెస్ సభ్యురాలు ప్రమీలా జయపాల్ ఈ ఘటనను జాతి వివక్షతో కూడిన ప్రదర్శనగా అభివర్ణించారు. హిందూ సమాజం ఎటువంటి భయం లేకుండా పండుగను జరుపుకోగలగాలని ఆమె పేర్కొన్నారు.
ఎక్స్ మాధ్యమంగా ఆమె ప్రతిస్పందిస్తూ.. ‘‘ఈ నీచమైన, జాత్యహంకార ప్రదర్శనను చూసి నేను తీవ్రంగా అసహ్యించుకుంటున్నాను. దీపావళి హిందువులకు అత్యంత ముఖ్యమైన పండగ. సమాజం అంతా అత్యంత వైభంగా, సురక్షితంగా జరుపుకోవాలి. ఈ ద్వేషపూరిత ప్రదర్శనకు మన నగరంలో గానీ, మన దేశంలో గానీ చోటు లేనే లేదు’’ అంటూ స్పష్టం చేశారు.
భారతీయ అమెరికన్ వ్యాపారవేత్త అజయ్ జైన్ భూటోరియా కూడా ఈ నిరసనను ఖండిస్తూ, దీనిని “పూర్తి మూర్ఖత్వం” అని అభివర్ణించారు. హిందువులను లక్ష్యంగా చేసుకుని చేసే జాతిపరమైన దూషణలకు యునైటెడ్ స్టేట్స్‌లో చోటు లేదని ఆయన అన్నారు.