హిందూ మనోభావాలు దెబ్బతిన్నాయి.. సోనియా గాంధీ క్షమాపణలు చెప్పాలి : VHP

 

 

న్యూఢిల్లీ : విశ్వహిందూ పరిషత్ కేంద్ర సంయుక్త ప్రధాన కార్యదర్శి డాక్టర్ సురేంద్ర జైన్ కాంగ్రెస్ అగ్రనేత సోనియా గాంధీ పలు ఘటనలపై స్పందించిన తీరును సూటిగా ప్రశ్నించారు. బాబ్రీ కట్టడం కూల్చివేతపై ఆమె ఆందోళన వ్యక్తం చేశారని, కానీ హిందువులు అనుభవించిన బాధల పట్ల లేదా భద్రతా సిబ్బంది చేసిన త్యాగాల పట్ల అటువంటి ఆందోళనను ఆమె చూపలేదని ఆయన ఆరోపించారు.సోనియా గాంధీ ఆత్మకథ 'బిలాంగింగ్: ఎ జర్నీ ఆఫ్ లవ్' విడుదల నేపథ్యంలో ఆయన ఈ వ్యాఖ్యలు చేశారు.

 

ఢిల్లీలోని బట్లా హౌస్ ఎన్‌కౌంటర్‌ను గుర్తుచేస్తూ, ఉగ్రవాదులపై జరిగిన ఆపరేషన్‌కు సోనియా గాంధీ భావోద్వేగంతో స్పందించడం భద్రతా దళాల పట్ల ఆమె సున్నితత్వంపై ప్రశ్నలు లేవనెత్తిందని డాక్టర్ జైన్ అన్నారు. ఉగ్రవాదులు ఇన్‌స్పెక్టర్ మోహన్ శర్మను తీవ్రంగా గాయపరిచారని, ఆయన ఆ తర్వాత గాయాలతో మరణించారని ఆయన గుర్తుచేస్తూ, ఆ పోలీస్ అధికారి త్యాగం పట్ల అదే విధమైన ఆందోళన వ్యక్తపరిచారా? అని ప్రశ్నించారు. దు:ఖ విషయాల పట్ల కూడా ఎంపిక చేసుకొని మరీ స్పందిస్తారా? అంటూ మండిపడ్డారు.

 

కాశ్మీర్‌లో 300కు పైగా దేవాలయాల విధ్వంసాన్ని, లోయలో హిందువులపై జరుగుతున్న హింసను ప్రస్తావించారు. కాశ్మీరీ హిందువుల వలసలు, వారి బాధలను కూడా ఆయన ఉటంకిస్తూ, వారి దుస్థితిపై సోనియా గాంధీ కూడా ఇలాంటి ఆవేదనను వ్యక్తం చేశారా అని ప్రశ్నించారు.

 

మాజీ ప్రధాని ఇందిరా గాంధీ హయాంలో, గోరక్షణ సంకల్పంతో ఢిల్లీలో సమావేశమైన వందలాది మంది నిరాయుధ సాధువులను హతమార్చిన ఘటనను ఆయన ప్రస్తావించారు. అలాగే, శరద్ కొఠారి, రామ్ కొఠారితో సహా కరసేవకుల హత్యల గురించి కూడా ఆయన పేర్కొంటూ, వారి మరణాల పట్ల కూడా అటువంటి స్పందనే వ్యక్తమైందా అని ప్రశ్నించారు.

 

హిందువులపై జరుగుతున్న ఉగ్రవాద, హింసాత్మక ఘటనల గురించి మాట్లాడుతూ, పహల్గామ్‌లో హిందూ పర్యాటకుల హత్యను డాక్టర్ జైన్ ప్రస్తావించారు. వారి మతం గురించి అడిగినందుకే వారిని లక్ష్యంగా చేసుకున్నారని ఆయన ఆరోపించారు. బంగ్లాదేశ్, పాకిస్తాన్‌లలో హిందువులపై జరుగుతున్న దాడులు, అలాగే పశ్చిమ బెంగాల్, కేరళలలో చోటుచేసుకున్న హింసాత్మక ఘటనల విషయాన్ని కూడా ఆయన ప్రస్తావించారు.

1984 నాటి సిక్కు వ్యతిరేక హింసాకాండను కూడా ప్రస్తావిస్తూ, సిక్కుల ఊచకోతపై సోనియా గాంధీ ఇలాంటి దుఃఖాన్నే వ్యక్తం చేశారా, ఆ దురాగతాలను నివారించడానికి ఆమె జోక్యం చేసుకున్నారా అని డాక్టర్ జైన్ ప్రశ్నించారు.

 

సోనియా గాంధీ పక్షపాత ధోరణితో వ్యవహరిస్తున్నారని ఆరోపిస్తూ, బాబ్రీ కట్టడంపై ఆమె కార్చారని చెప్పబడుతున్న కన్నీళ్లను డాక్టర్ జైన్ "మొసలి కన్నీళ్లు" మరియు "ఎన్నికల కన్నీళ్లు"గా అభివర్ణించారు. హిందువుల బాధలను, భద్రతా సిబ్బంది త్యాగాలను విస్మరిస్తూ, ఒక నిర్దిష్ట ఓటు బ్యాంకును ప్రసన్నం చేసుకోవడానికే ఇటువంటి ప్రకటనలు, ప్రతిచర్యలు లక్ష్యంగా ఉన్నాయని ఆయన ఆరోపించారు.

 

ఎన్నికల సమయంలో చేసిన కొన్ని వ్యాఖ్యలు హిందువుల మనోభావాలను దెబ్బతీశాయని ఆయన అన్నారు. దీపావళి వల్ల వాయు కాలుష్యం పెరుగుతుందని, అదే సమయంలో ఈద్ వల్ల అటువంటి ప్రభావం ఉండదని ఒక కాంగ్రెస్ నాయకుడు చేసిన వ్యాఖ్యను ప్రస్తావిస్తూ, సోనియా గాంధీ మరియు కాంగ్రెస్ నాయకత్వం ఇటువంటి వ్యాఖ్యల పట్ల విచారం వ్యక్తం చేయడానికి సిద్ధంగా ఉన్నాయా అని డాక్టర్ జైన్ ప్రశ్నించారు.

లౌకికవాదాన్ని సమర్థిస్తున్నామని చెప్పుకునే పార్టీలు, హిందూ సంప్రదాయాలను, మనోభావాలను కించపరిచే

 

ప్రకటనలు చేస్తూ ముస్లిం ఓటర్లను ఆకర్షించడానికి ప్రయత్నిస్తున్నాయని డాక్టర్ జైన్ ఆరోపించారు.అటువంటి ప్రయత్నాలకు హిందూ సమాజం ప్రతిస్పందిస్తుందని, తమ విశ్వాసాన్ని, సంప్రదాయాలను లేదా జాతీయ గుర్తింపును అవమానించే ప్రయత్నాలను అంగీకరించబోదని ఆయన అన్నారు. ఉగ్రవాదుల పట్ల తప్పుడు సానుభూతిని ప్రదర్శించడం ద్వారా జాతీయ భద్రతను దెబ్బతీసే వైఖరుల పట్ల కూడా ఆయన హెచ్చరించారు.