భారతీయ సంస్కృతిని ఆచరించడమే మెకాలే విధానానికి విరుగుడు : అయాచితుల లక్ష్మణ రావు

 

భైంసా : విద్యా భారతి దక్షిణ మధ్య క్షేత్ర సమితి ఆధ్వర్యంలో నవంబర్ 6 న మహిషా (భైంసా) పట్టణంలో ‘‘మెకాలే విద్యా విధానం - ప్రభావం’’ అనే అంశంపై విద్వత్ గోష్ఠి జరిగింది. ఆర్ఎస్ఎస్ జ్యేష్ఠ ప్రచారకులు, శ్రీ సరస్వతీ విద్యాపీఠం సంస్థాపక కార్యదర్శి శ్రీ శఠగోపం లక్ష్మీ నరసింహాచార్యులు (శ.ల.న. ఆచార్యులు) వర్ధంతి సందర్భంగా మహిషా పట్టణంలోని శ్రీ లక్ష్మీ నరసింహ కల్యాణ మండపంలో ఈ కార్యక్రమం జరిగింది.

జ్యోతి ప్రజ్వలన, శలన ఆచార్యులకు పుష్పార్చనతో ఈ కార్యక్రమం ప్రారంభమైంది. మొదట విద్యా భారతి దక్షిణ మధ్య క్షేత్ర సంఘటనా కార్యదర్శి లింగం సుధాకర రెడ్డి కార్యక్రమ ప్రస్తావన చేశారు. దేశ వ్యాప్తంగా 24 వేల పైచిలుకు విద్యాలయాలను విద్యాభారతి నడిపిస్తోందని, దీని ద్వారా అనేక మంది విద్యార్థులు ఉత్తమ పౌరులుగా తయారై, దేశానికి సేవలందిస్తున్నారని తెలిపారు. 1952 లో గోరఖ్ పూర్ శ్రీ సరస్వతీ శిశు మందిర్ కి బీజారోపణ జరిగిందని, ఇందులో నానాజీ దేశ్ ముఖ్ కీలక పాత్ర పోషించారన్నారు. దీంతో దేశ వ్యాప్తంగా ఆయా రాష్ట్రాల్లో కూడా శ్రీ సరస్వతీ శిశు మందిర్ పాఠశాలలకు డిమాండ్ పెరిగిందన్నారు.

 

శలన ఆచార్యులు మొదట ఖమ్మం జిల్లాలో ప్రభుత్వ ఉపాధ్యాయులుగా పనిచేసేవారని, జాగృతి పత్రిక ప్రేరణతో ఆయనకు సంఘ పరిచయం కలిగిందని వివరించారు. దీంతో 1959 లో సంఘ శిక్షావర్గలు పూర్తి చేశారని, చివరికి తృతీయ శిక్షావర్గ పూర్తి చేసి, ప్రభుత్వ ఉద్యోగాన్ని వదిలేసి మరీ సంఘ్ ప్రచారక్ గా వచ్చేశారని వివరించారు. దీంతో ఖమ్మం జిల్లా ప్రచారక్ గా పనిచేసి, ఆ తర్వాత ఆదిలాబాద్ జిల్లా ప్రచారక్ గా వచ్చేశారన్నారు. అత్యంత కఠినమైన పరిస్థితుల్లో సంఘ్ వ్యాప్తికి కృషి చేశారని సుధాకర రెడ్డి వివరించారు. ఈ సమయంలోనే అప్పటి ప్రాంత ప్రచారక్ సోమేపల్లి సోమయ్య సూచనతో శలన ఆచార్యులు గోరఖ్ పూర్ వెళ్లి, శిశు మందిరాల వ్యవస్థ గురించి అధ్యయనం చేశారని, దీని తర్వాత 1967 లో మొదటి సారిగా తెలుగు రాష్ట్రాల్లో నిర్మల్ లోని రథాల గుడిలో మొట్ట మొదటి శిశు మందిరానికి అంకురార్పణ జరిగిందని వివరించారు.ఆ తర్వాత సమాజ సహకారంతో అన్ని చోట్లా శిశు మందిరాలు ప్రారంభం అయ్యాయని,విద్యాపీఠం పేరుతో ప్రాంత సంఘటన కూడా ప్రారంభమయ్యిందన్నారు.

 

శలన ఆచార్యులు అన్ని ప్రాంతాలకు తిరుగుతూ, సజ్జన శక్తితో సంపర్కం చేస్తూ, విద్యాపీఠానికి అనుసంధానం చేసేవారని, ఇదే సమయంలో పాఠశాలల కోసం భూమిని కూడా సేకరించేవారని గుర్తు చేశారు. ఇలాగే జమ్మికుంట, తడ్కపల్లి, శారదా ధామం లాంటివి వచ్చాయన్నారు. ఆ తర్వాత వారే ఆచార్యులకు ప్రశిక్షణావర్గలు రూపొందించారని, వారు కూడా వాటిలో స్వయంగా పాఠాలు చెప్పేవారన్నారు. దేశ వ్యాప్తంగా శ్రీ శారదా ధామం అత్యంత ఆకర్షణగా వుండేట్లు రూపొందించారని, ఉపాధ్యాయుల సంక్షేమం కోసం, సమగ్ర కార్యాచరణ రూపొందించారన్నారు. అలాగే విద్యాపీఠం కోసం ‘‘స్ఫూర్తి’’ అనే పత్రికను కూడా ప్రారంభించారన్నారు. ఇప్పటి నుంచి శలన ఆచార్యుల వర్ధంతిని పురస్కరించుకొని విద్యా భారతి దక్షిణ మధ్య క్షేత్రం ఆధ్వర్వంలో గోష్ఠి కార్యక్రమాలు నిర్వహించాలన్న ఆలోచనలో వున్నామని సుధాకర రెడ్డి ప్రకటించారు.

 

ఇక.. ఈ కార్యక్రమానికి విద్యా భారతి దక్షిణ మధ్య క్షేత్ర కార్యదర్శి అయాచితుల లక్ష్మణ రావు వక్తగా హాజరయ్యారు. ఈ సందర్భంగా ఆయన మెకాలే విద్యా విధానం, ప్రస్తుత పరిస్థితులపై వివరంగా మాట్లాడారు. బ్రిటీష్ క్రైస్తవులు ఓ పద్ధతి ప్రకారమే భారత్ లోకి వచ్చారని, జ్ఞాన సంపదను అధ్యయనం చేసి, అన్నీ తెలుసుకునే వచ్చారన్నారు. ఫ్రాన్స్, ఇంగ్లాండ్, భారత్ లోని జ్ఞాన సంపదను నాశనం చేశారని, అందులో భాగమే మెకాలే మినిట్స్ అని వివరించారు.

 

మెకాలే మినిట్స్ లో సంస్కృతం, అరబిక్ లాంగ్వేజెస్ కి గ్రాంట్స్ అనవసరంగా ఖర్చు చేస్తున్నారని, అదంతా ప్రజల సొమ్ము వృథా అవుతోందని పేర్కొన్నారన్నారు. సంస్కృతం మృత భాష అని, కేవలం సంపన్న వర్గాల భాషగా మెకాలే వికృత భాష్యం చెప్పారన్నారు. సమాజంలో మధ్యస్థ వర్గాన్ని తయారు చేయడమే మెకాలే టార్గెట్ అని, అభిప్రాయాలు, మేధస్సు మనది, శరీరం మాత్రం భారతీయులదే’’ అన్న చందంగా, అంతలా భారతీయులను ప్రభావితం చేయాలన్న కుట్రే మెకాలే విధానం అని వివరించారు. లక్ష రూపాలయ గ్రాంటు సంస్కృతం, అరబిక్ లాంటి భాషలకు కాకుండా ఆంగ్ల భాషకు ఇవ్వాలని మెకాలే మినిట్స్ లో ప్రతిపాదించారని, దీని ద్వారా భారతీయులను మార్చేయవచ్చన్న గట్టి ప్రతిపాదనలు పెట్టారన్నారు.

 

భారతీయులకు ఆంగ్లం, భారతీయ సైన్స్ కాకుండా వెస్ట్రన్ సైన్స్ నేర్పించాలని కూడా మెకాలే కుట్ర పన్నారని, భారతీయులు అనాగరికులని, వారి జ్ఞాన సంపద అంతా మూఢ నమ్మకం అని, వారికి వెస్ట్రన్ సైన్స్ నేర్పించాలని పేర్కొన్నారన్నారు. అంతా నాగరికులని, వారికి నేర్పించాల్సిన బాధ్యత మనపై వుందని పేర్కొంటూ మెకాలే విధానాన్ని జొప్పించారన్నారు. ఈ మెకాలే విద్యా విధానం జ్ఞానుల్ని తయారు చేయకుండా, కేవలం గుమాస్తాలను తయారు చేస్తోందని, 200 సంవత్సరాలు దాటినా, మన మెదడులోంచి మెకాలే విధానం వెళ్లిపోకుండా వుండేట్లు కుట్రలు చేశారన్నారు. పిల్లలు గర్భంలో వున్నప్పుడే తల్లిదండ్రులు మంచి ఇంగ్లీషు మీడియం స్కూల్ లో చేర్పించాలని ఆలోచిస్తున్నారని, ఇంతలా మెకాలే ప్రభావితం చేస్తున్నారని ఆవేదన వ్యక్తం చేశారు.

 

నిజానికి 1947 వరకే మెకాలే విద్యా విధానం కొనసాగాలి, కానీ.. ఆ తర్వాత కూడా కొనసాగుతోందని, మెకాలే విద్యా విధానం కొనసాగిందని, దీనికి అప్పటి కేంద్ర ప్రభుత్వాలే కారణమని ఆరోపించారు. ఇప్పటి NEP2020 లో వున్న అంశాలే కొఠారీ కమిషన్ లో కూడా వున్నాయని, కానీ.. అప్పటి కేంద్ర ప్రభుత్వాలు అమలు చేయలేదన్నారు. ఎందుకంటే మొదటి విద్యామంత్రి అబుల్ కలాం ఆజాద్ ఇక్కడి వ్యక్తి కాదని, మక్కాలో పుట్టారన్నారు. స్వాతంత్రం వచ్చిన తర్వాత దాదాపు 24 సంవత్సరాలు మన దేశానికి ముస్లింలే విద్యా మంత్రులుగా కొనసాగారని, అయితే అలా వుండటం తప్పుకాదు కానీ.. భారతీయ మూలాలున్న విద్యా విధానాన్ని తీసుకురాలేదని విమర్శించారు. NCERT, CBSE ద్వారా ఇస్లామిక్, బార్బేనియన్ విద్యా విధానం కోసం ప్రయత్నాలు జరిగాయని ఆరోపించారు.

 

భారతీయులను తమ మూలాల నుంచి వేరు చేయడమే మెకాలే విద్యా విధానం అసలు లక్ష్యమని వివరించారు .అయితే.. ముస్లింలపై మెకాలే విద్యా విధానం ప్రభావం అంతగా లేదని, వారు ఇప్పటికీ పూర్తిగా వారి సంప్రదాయంలోనే విద్యా విధానాన్ని కొనసాగిస్తున్నారని, కేవలం హిందువులపైనే ఎక్కువగా మెకాలే విద్యా విధానం ప్రభావం పడుతోందన్న విషయాన్ని గుర్తించాలని నొక్కి చెప్పారు. ఎం.ఏ. లాంటి పై చదువుల్లోనూ ఇంగ్లీషు సాహిత్యం వెస్ట్రన్ మూలాలున్నదే వున్నది కానీ.. భారతీయ మూలాలున్న సాహిత్యం లేదన్నారు. సాహిత్యానికి, సంస్కృతికి అవినాభావ సంబంధం వుంటుందని, అసలు ఇంగ్లీషు పాఠ్యాంశాల్లో మన భారతీయ మూలాలున్న పాఠ్యాంశాలే లేవన్నారు. నిజానికి ఉన్నత విద్యావంతులు కూడా మన భారతీయ మూలాలున్న సాహిత్యాన్ని చదవడం పూర్తిగా మానేశారని అసంతృప్తి వ్యక్తం చేశారు. అసలు మనం మన పుస్తకాలను, సాహిత్యాన్ని ముట్టుకోకుండా మెకాలే కుట్ర పన్నారని, అలాగే మన తల్లిదండ్రులు చెబితే పిల్లలు వినడం లేదని, అదే విదేశీయులు, విదేశీ సంస్థలు, విదేశీ మీడియా చెబితే ఠక్కుమని వినే దుస్థితిలోకి నెట్టివేయబడ్డామన్నారు. మన మూలాలతో హిందువులు అనుసంధానం అవ్వట్లేదని, భారతీయ శాస్త్రాలను అధ్యయనం చేయడం లేదని, అంతా పాశ్చాత్యీకరణనే నడుస్తోందని, నిజానికి మెకాలేను సక్సెస్ చేసింది మన సమాజమే అని చురకలంటించారు.

 

అయితే.. భారత్ నుంచి మెకాలే లాంటి విద్యా విధాలను తుడిచిపెట్టేయడానికి 1925, 1952, 2014, 2020, 2025 లో ప్రయత్నాలు ప్రారంభమయ్యాయని వివరించారు.1925 లో ఆర్ఎస్ఎస్ స్థాపన జరిగిందని, దీని ద్వారా కల్చరల్ యూనిటీ, సాంస్కృతిక ఏకత్వం, భారతీయ సంస్కృతితో విడదీయరాని అనుబంధాన్ని ప్రజలకు ఏర్పర్చడం, వ్యక్తి నిర్మాణమే లక్ష్యంగా పనిచేస్తోందన్నారు. ఆర్ఎస్ఎస్ కార్య శతాబ్ది సందర్భంగా పంచ పరివర్తనను సంఘ్ సమాజం ముందుకు తీసుకెళ్లిందని, దీని ద్వారా సమాజంలో మార్పు మొదలవుతోందన్నారు. సంఘ్ సమాజాన్ని భారతీయ మూలాలతో అనుసంధానం చేసే పని చేస్తోందన్నారు.

ఇక. ..1952 లో విద్యా భారతి స్థాపన జరిగిందన్నారు. ఇది దేశవ్యాప్తమైందని, 67 దేశాల్లో విద్యాభారతి పూర్వ విద్యార్థులు వున్నారని, చివరికి చంద్రమండలానికి కూడా వెళ్లారన్నారు. విద్యా రంగంలో విప్లవం కోసం, భావి తరాలకు సంస్కృతీ సంప్రదాయాలను అందించడమే విద్యాభారతి కార్యమని వివరించారు.

 

అలాగే 2014 లో జాతీయ ప్రభుత్వాల ఏర్పాటు జరిగిందని, మెకాలే బదులు భారత్ అన్న దృక్పథంతో ప్రభుత్వం ఏర్పడిందన్నారు. 2020 లో NEP వచ్చిందని, పబ్లిక్ ఒపీనియన్ తో డాక్యుమెంట్ కూడా వచ్చిందన్నారు. దీనిని 50 శాతం విద్యా భారతి, శిశు మందిరాలు ప్రభావితం చేశాయన్నారు.ఇక.. 2025 లో సంఘ్ కార్య శతాబ్ది అని, దీని ద్వారా పంచ పరివర్తనతో సమాజంలోకి వెళ్లిందన్నారు.

 

ప్రతి సారీ మెకాలేను తిట్టడం మానేసి, మనమంతా మన భారతీయ శాస్త్రాలను, భారతీయ సంస్కృతితో అనుసంధానం కావాలని, కేవలం అనుసంధానం అవ్వడమే కాకుండా వాటిని ఆచరణలోకి తీసుకురావాలని, ఇదే మెకాలేకి విరుగుడు అని సూచించారు. శ్రీ సరస్వతీ శిశు మందిరాలు ఆంగ్ల భాషకి వ్యతిరేకం కాదని, కాకపోతే ఆంగ్ల సంస్కృతికి మాత్రం పూర్తి విరుద్ధమని స్పష్టతనిచ్చారు. భారతీయ మూలాలున్న విద్యా విధానాన్ని సరస్వతీ శిశు మందిరాలు బోధిస్తాయన్నారు. భారతీయులను మన సంస్కృతితో అనుసంధానం చేయాలని, ఇది ప్రభుత్వాలు చేసే పని కాదని, వ్యక్తిగత ఆచరణ చేయాలని, అప్పుడే మెకాలేను మనస్సుల్లొంచి పూర్తిగా తుడిచిపెట్టేయగలని సూచించారు.

 

మెకాలే విద్యా విధానాన్ని తుడిచేయడానికి అందరూ భారతీయ మూలాలతో అనుసంధానమై, వాటిని ఆచరణలో పెట్టాలని సూచించారు. దీని కోసం ప్రతి జిల్లాలో అధ్యయన కేంద్రాలు ఏర్పాటు కావాలని, వీటి కేంద్రంగా అందర్నీ భారతీయ మూలాలతో అనుసంధానం చేసే ప్రయత్నం చేయాలని, ఇదే మెకాలేకి విరుగుడు అని అయాచితుల లక్ష్మణ రావు పిలుపునిచ్చారు.

 

ఈ సందర్భంగా నలుగురు విద్యావంతులు తమ పత్ర సమర్పణ చేశారు. ఇందులో మెకాలే విద్యా విధానం, భారతీయ సంస్కృతిపై పడుతున్న అవధోరణులు, మెకాలే పనితీరు, మెకాలే డాక్యుమెంట్లు, మెకాలే విద్యా విధానానికి విరుగుడును వివరించారు. చివరగా పూర్తి వందేమాతర గీతాలాపనతో కార్యక్రమం ముగిసింది.