పాములు పాలు తాగవు.. నాగుల చవితికి పాలు పోయడం వెనుక వున్న తత్త్వమిదే..

 

 

నాగుల చవితి వచ్చేసింది. నాగుల చవితి సందర్భంగా మనమందరమూ కూడా పాము పుట్టల దగ్గరికి వెళ్లి, పాలు పోసి, శ్రద్ధగా నమస్కరించి వస్తాం. ఇది తరతరాలుగా వస్తోన్న హిందూ సంప్రదాయం. అలాగే నాగుల బట్ట అని కూడా ఓ వస్త్రాన్ని సమర్పిస్తారు. అయితే.. నిజానికి పాము పాలు తాగదు. బట్టలు వేసుకోదు. తెలిసి కూడా మనం ఎందుకు సమర్పిస్తాం?

 

అయితే.. ఇదేమీ హిందువుల మూఢ నమ్మకం అస్సలు కాదు. దీని వెనుక వున్న అంతరార్థాన్ని, తత్త్వాన్ని మనం గ్రహించుకోవాలి. దీని వెనుక ఓ ‘‘సర్పశక్తి’’ అని ఒకటి వుంది. సర్పశక్తి అనుగ్రహం గనక వుంటే సంతానం కలగడం, వ్యాధులు పోవడం అవన్నీ అవుతాయి. అలాగే ఆ శక్తికి పాలు అన్నా, తెలుపు, ఎరుపు రంగులన్నా.. ప్రీతి. అందుకే మన రుషులు ఆ శక్తికి సమర్పించమన్నారు. నేరుగా మనం ఆ శక్తిని అందుకోలేం కాబట్టి, పుట్టల దగ్గరికి వెళ్లి సమర్పిస్తుంటారు. అంతేకానీ.. మనం చేస్తున్నవన్నీ ఆ పుట్టలోని పాములకు కాదు. సర్పం అన్న దేవతా శక్తికి చేస్తున్నాం. పుట్టలో వున్న పాము ఆ శక్తికి ఓ ప్రతినిధి అంతే.

 

అలాగే మన వేదంలో కూడా ‘‘నమో అస్తు సర్పేభ్యో..ఏకే చ పృథివీ మను:’’.. యావత్ సృష్టి కూడా సర్పాలచే పరివేష్టితమై, రక్షింపబడుతోందని దీనర్థం. అలాగే శివుడు నాగాభరణుడు, విష్ణువు నాగ శయనుడు, బ్రహ్మకి ఓ చేతిలో నాగం ఆభరణంగా వుంటుంది. అయితే ఈ సర్పం కాలానికి ప్రతీక.