మణికర్ణిక నుంచి యుద్ధనారి దాకా.. నేటి యువతకు రాణి లక్ష్మీబాయి నేర్పే పాఠాలేంటి?

VSK Telangana    17-Nov-2026
Total Views |

jhansi rani 
 
చరిత్ర పుటల్లో ఇసుక రాలిపోయినా చెరిగిపోని కొన్ని పేర్లుంటాయి. అందులో ముందుగా వినిపించే పేరు.. ధైర్యానికి, ఆత్మగౌరవానికి నిలువెత్తు రూపం ఝాన్సీ రాణి లక్ష్మీబాయి. నేటి మోడర్న్ యుగంలో మన చేతిలో స్మార్ట్‌ఫోన్‌లు, సోషల్ మీడియా రీల్స్, కెరీర్ టెన్షన్లు కామన్ అయిపోయాయి. మరి సరిగ్గా రెండొందల ఏళ్ల క్రితం.. అదీ ఓ మహిళ... ఏకంగా బ్రిటీష్ సామ్రాజ్యాన్నే గడగడలాడించిన తను ఓ యోధురాలు.. మరి ఆ యోధురాలి నుంచి నేటి యువత, ముఖ్యంగా అమ్మాయిలు ఏం నేర్చుకోవాలి?
 
పరిస్థితులు బాధ్యతను మోపితే.. బాధ్యతే బలమవ్వాలి!
 
రాణిలక్ష్మీబాయి అసలు పేరు మణికర్ణిక...మను అని పిలిచేవాళ్లు. చిన్నతనంలో కేవలం కత్తిసాము, గుర్రపుస్వారీ నేర్చుకున్న సాధారణ అమ్మాయే. కానీ పెళ్లయిన కొద్దికాలానికే భర్త మరణం, అప్పుడే పుట్టిన బిడ్డను కోల్పోవడం, దత్తపుత్రుడిని ఎత్తుకుని రాజ్యాన్ని ఒంటరిగా కాపలా కాయాల్సిన పరిస్థితి. ఎవరైనా సరే ఆ పరిస్థితిలో కుంగిపోతారు. కానీ లక్ష్మీబాయి అలా చేయలేదు. ఆ కష్టాన్నే తన బలగంగా మలచుకుంది. అలా నేటి కాలం అమ్మాయిలకు జీవితంలో కెరీర్ పరంగానో, వ్యక్తిగతంగానో అనుకోని అడ్డంకులు ఎదురైతే కుంగిపోకుండా, ఆ సమస్యే నిన్ను మరింత స్ట్రాంగ్ చేస్తుందనే నమ్మకంతో ముందుకు వెళ్లాలి.
 
‘నా కోసమే కాదు.. సమాజం కోసం’ అనే నిస్వార్థ నాయకత్వం
 
నేడు చాలామంది కేవలం తమ సొంత సంపాదన, కెరీర్, లైఫ్ స్టైల్ చుట్టూనే తిరుగుతుంటారు. కానీ లక్ష్మీబాయి ఆలోచనల పరిధి చాలా విశాలమైనది. తన రాజ్యాన్ని, తన ప్రజలను కాపాడుకోవడం కోసం ఆమె తన ప్రాణాలను పణంగా పెట్టింది. శత్రువుల ముందు మోకరిల్లి, ఎంగిలి మెతుకులు తినే బానిస బతుకకంటే.. పోరాడి ప్రాణాలు కోల్పోవడమే మేలని నమ్మింది. నేటి యువతలో కూడా కేవలం వ్యక్తిగత స్వార్థం కాకుండా, తోటివారికి సాయపడే తత్వం, సమాజంలో ఏదైనా తప్పు జరుగుతుంటే ప్రశ్నించే తెగింపు ఉండాలి. అదే అసలైన నాయకత్వ లక్షణం.
 
'మేరీ ఝాన్సీ నహీ దూంగీ' - రాజీ పడని ఆత్మగౌరవం..
 
మేరీ ఝాన్సీ నహీ దూంగీ... చరిత్రలో ఆమె వాడిన ఈ ఒక్క మాట కోట్లాది మందికి స్ఫూర్తి. "నా హక్కును, నా ఆత్మగౌరవాన్ని ఎవరికీ తాకట్టు పెట్టను" అనే గట్టి పట్టుదల ఆమెది. నేటి మగువలు ఏ రంగంలోనైనా సరే.. వర్క్‌ ప్లేస్ అయినా, పర్సనల్ లైఫ్ అయినా.. ఎక్కడైనా సరే రాజీ పడకూడని చోట గొంతు ఎత్తాలి. మనల్ని మనం తక్కువగా అంచనా వేసుకునే వాళ్లకు మన చేతలతోనే సమాధానం చెప్పాలి.
 

శారీరక, మానసిక దారుఢ్యం
 
రాణి లక్ష్మీబాయి అంటే కేవలం ఒక రాణి మాత్రమే కాదు, అసాధారణ యోధురాలు. ఆమె రోజువారీ దినచర్యలో కత్తిసాము, విలువిద్య, గుర్రపుస్వారీ భాగం. నేటి అమ్మాయిలు అందం, గ్లామర్ చుట్టూ తిరగడం కంటే.. ఫిట్‌నెస్, మానసిక ధైర్యం పై దృష్టి పెట్టాలి. శరీరం దృఢంగా ఉంటేనే, మనసు తీసుకునే నిర్ణయాలు పదునుగా ఉంటాయి. ఎలాంటి కష్టకాలంలోనైనా నిలబడే శక్తి ఇస్తుంది.
 
ఝాన్సీ లక్ష్మీబాయి కేవలం 1857 నాటి చరిత్ర కాదు. ఈనాటి ప్రతి మహిళ గుండెల్లో ఉండే పోరాట స్ఫూర్తి. అప్పట్లో ఆమె తన దత్తపుత్రుడిని వీపునకు కట్టుకుని యుద్ధంలోకి దూకింది.. ఇప్పడు మన అమ్మాయిలు తమ కలలను, బాధ్యతలను భుజాన వేసుకుని సమాజాన్ని జయిస్తున్నారు. రాణి లక్ష్మీబాయి మనందరికీ ఒకటే చెబుతోంది—"పరిస్థితులు నిన్ను ఎంత కిందకు లాగాలని చూసినా, నీలోని యోధురాలిని నిద్రలేపు.. గెలుపు నీదే అవుతుంది!"