తాను కరుగుతూ చుట్టూ వెలుగులు పంచే దీపంలాగే, నేటి సమాజంలోని ప్రతి మహిళ ఒక దీపంలా మారి దేశ ప్రగతిలో వెలుగులు నింపాలని రాష్ట్ర సేవికా సమితి అఖిల భారతీయ ప్రముఖ కార్యవాహిక అన్నదానం సీతగారు పిలుపునిచ్చారు. రాష్ట్ర సేవికా సమితి స్థాపించి 90 ఏళ్లు పూర్తయిన సందర్భంగా, ఆ సంస్థ సుదీర్ఘ ప్రస్థానాన్ని వివరిస్తూ డాక్టర్ సురభి భదౌరియా రచించిన ప్రత్యేక పుస్తకాన్ని (బుక్లెట్) లక్నోలోని ఇందిరా గాంధీ ప్రతిష్ఠాన్లో ఆవిష్కరించారు.
ఈ సందర్భంగా సీతక్క మాట్లాడుతూ.. నేటి రీల్స్ యుగంలో ప్రజల ఏకాగ్రత కేవలం ఒకటి రెండు నిమిషాలకే పరిమితమైపోయిందని, టీవీలు లేదా యూట్యూబ్లో ఏదైనా అంశాన్ని పది నిమిషాల పాటు నిలకడగా చూసే ఓపిక కూడా లేకుండా పోయిందని ఆవేదన వ్యక్తం చేశారు. ఇలాంటి సమయంలో సమితి 90 ఏళ్ల సేవలను నేటి యువతరానికి సులభంగా అర్థమయ్యేలా పుస్తక రూపంలో తీసుకురావడం అభినందనీయమన్నారు. మహిళల కోసం పనిచేసే సంస్థలు ఎన్నో ఉన్నప్పటికీ, మహిళల శక్తిని, సంస్కారాన్ని దేశ నిర్మాణంతో అనుసంధానం చేసి, వారిని దేశం కోసం పనిచేసేలా ప్రేరేపించే ఏకైక సంస్థ రాష్ట్ర సేవికా సమితి అని ఆమె పేర్కొన్నారు.
కార్యక్రమంలో ముఖ్య అతిథిగా పాల్గొన్న పద్మభూషణ్ అవార్డు గ్రహీత, ప్రముఖ పారాలింపిక్ అథ్లెట్ దీపా మాలిక్ మాట్లాడుతూ.. జీవితంలో ఎప్పుడూ ఓటమిని అంగీకరించకూడదని, పట్టుదల, స్పష్టమైన లక్ష్యం ఉంటే ఎలాంటి సవాళ్లనైనా అధిగమించవచ్చని స్పష్టం చేశారు. 1936లో లక్ష్మీబాయి కేల్కర్ ఒక చిన్న ఆలోచనతో ప్రారంభించిన ఈ సంస్థ, నేడు దేశంలోని మారుమూల గ్రామాలకు సైతం విస్తరించి మహిళల్లో ఆత్మవిశ్వాసాన్ని నింపడం గర్వకారణమన్నారు. మహిళలు ఒకరికొకరు తోడుగా నిలుస్తూ సమాజం పట్ల సానుకూల దృక్పథాన్ని పెంపొందించుకోవాలని సూచించారు.
తూర్పు ఉత్తరప్రదేశ్ క్షేత్ర ప్రచారిక శశి బఘేల్ మాట్లాడుతూ.. ఒక చిన్న విత్తనంలా మొదలైన సమితి ప్రస్థానం నేడు మహా వటవృక్షంలా విస్తరించి, ప్రపంచంలోనే అతిపెద్ద మహిళా సంస్థగా ఎదిగిందని తెలిపారు. మహిళల శారీరక, మానసిక వికాసంతో పాటు వ్యక్తిత్వ నిర్మాణానికి సమితి కృషి చేస్తోందన్నారు. ఈ కార్యక్రమంలో మహారాణా ప్రతాప్ ఇన్స్టిట్యూట్ డైరెక్టర్, పుస్తక రచయిత్రి డాక్టర్ సురభి భదౌరియా తదితరులు పాల్గొన్నారు.