లెఫ్ట్ అతివాదం వెన్నుముక విరిచేశాం.... కొత్త శకం ప్రారంభించాం : ప్రధాని మోదీ
Total Views |
బస్తర్ : భారత్ నక్సలిజం రహితంగా మారిన తర్వాత వస్తున్న తొలి దీపావళి పండగ ఇదేనని ప్రధాని నరేంద్ర మోదీ అన్నారు. దీపావళి పర్వదినం సందర్భంగా ప్రధాని ఛత్తీస్ గఢ్ లోని బస్తర్ జిల్లాలో పర్యటించారు. భద్రతా బలగాలతో కలిసి దీపావళి జరుపుకున్నారు. దశాబ్దాలుగా దేశాన్ని పట్టిపీడించిన నక్సలిజం, మావోయిస్టు ఉగ్రవాదంపై భారత్ సాధించిన ఈ చారిత్రాత్మక విజయం వల్ల ఈ సారి పండగ ఎంతో ప్రత్యేకంగా మారిందన్నారు. ఒకప్పుడు నక్సలైట్ల భయంతో వణికిన బస్తర్, ఇప్పుడు అభివృద్ధి బాటలో పయనిస్తోందన్నారు.
కోట్లాది మంది ప్రజలు నక్సలిజం భయం లేకుండా పండుగ జరుపుకుంటున్నారని వెల్లడించారు. ఆదివారం ఛత్తీస్‌గఢ్‌లోని బస్తర్ జిల్లా కరణ్‌పూర్‌లో ఉన్న కోబ్రా (CoBRA) ఆపరేషన్స్ బేస్‌ను ప్రధాని సందర్శించారు. అక్కడ భద్రతా బలగాలతో కలిసి దీపావళి వేడుకల్లో పాల్గొన్నారు. నక్సలిజంపై పోరాటంలో సైనికులు, భద్రతా సిబ్బంది చేసిన త్యాగాలను ఆయన కొనియాడారు.
ఒకప్పుడు మావోయిస్టుల కేంద్రంగా ఉన్న బస్తర్, అబుజ్‌మఢ్ ప్రాంతాల్లో ప్రస్తుతం పరిస్థితులు మారుతున్నాయని అన్నారు. భద్రతా బలగాల ధైర్యం, అంకితభావం, త్యాగాల కారణంగా నక్సలిజం ముప్పు తగ్గి అభివృద్ధికి మార్గం సుగమమైందని పేర్కొన్నారు. దేశవ్యాప్తంగా ప్రజలు తమ కుటుంబ సభ్యులతో కలిసి దీపావళి జరుపుకుంటున్న వేళ తాను మాత్రం దేశ రక్షణలో ఉన్న జవాన్లతో ఈ పండుగను చేసుకోవాలని నిర్ణయించుకున్నట్లు తెలిపారు. సరిహద్దుల్లోనే కాకుండా దేశ అంతర్గత ప్రాంతాల్లోనూ ప్రజలకు రక్షణ కల్పిస్తున్న భద్రతా సిబ్బంది తన కుటుంబ సభ్యులతో సమానమని అన్నారు.
గత ప్రభుత్వ హయాంలో భద్రతా బలగాలు చేతులు కట్టేసి వుంచారని విమర్శించారు. అప్పట్లో నక్సల్స్ దాడులు జరిగినా, తిప్పికొట్టే స్వేచ్ఛ సైనికులకు లభించేది కాదన్నారు. తమ ప్రభుత్వం అధికారంలోకి వచ్చాక, మైదానంలో పరిస్థితులకు తగ్గట్టుగా కీలక నిర్ణయాలు తీసుకునేందుకు జవాన్లు పూర్తి ఆపరేషనల్ స్వేచ్ఛ ఇచ్చామన్నారు. సున్నితత్వంతో పనిచేస్తూనే లెఫ్ట్ వింగ్ ఎక్స్ ట్రీమిజం వెన్నుముక విరిచేశామని, ప్రభావిత ప్రాంతాలలో ప్రజల జీవితాలను మార్చేసి, కొత్త అభివృద్ధి శకాన్ని ప్రారంభించామన్నారు.