సంఘ ప్రచారకుల అంకిత భావం, నిబద్ధత మాటల్లో, రాతల్లో చెప్పలేం : మోహన్ భాగవత్
Total Views |
నాగపూర్ : 1930వ దశకంలో సెంట్రల్ ప్రొవిన్సెస్ అసెంబ్లీలో సంఘ్‌పై మొదటిసారిగా నిషేధం విధించేందుకు జరిగిన ప్రయత్నం జరిగిందని ఆర్ఎస్ఎస్ సర సంఘచాలక్ మోహన్ భాగవత్ పేర్కొన్నారు. అయితే... ఆ సమయంలో సెంట్రల్ ప్రావిన్సెస్ అసెంబ్లీలో సంఘ్ సమర్థకులు ఎవ్వరూ లేరన్నారు. అలాగే సంఘ సిద్ధాంతానికి కూడా మద్దతు పలికేవారే లేరన్నారు. ఈ సమయంలోనే ఇబ్రహీం అనే వ్యక్తి సంఘ్ కి మద్దతుగా మాట్లాడారని, సంఘ్ పై నిషేధం విధించొద్దని, అతి మతతత్వ సంస్థేమీ కాదని గట్టిగా వాదించారని కూడా భాగవత్ గుర్తు చేశారు.
సెంట్రల్ ప్రావిన్సెస్ అసెంబ్లీలో ఇబ్రహీం మాట్లాడుతూ ‘‘నాకు డాక్టర్ హెడ్గేవార్ తెలుసు; ఆయనకు మానసిక సమస్య ఏమీ లేదు; ఆయన మంచి వ్యక్తి. కాబట్టి, సంఘ్ మతతత్వ సంస్థ కానే కాదు’’ అని గట్టిగా నొక్కి చెప్పారని భాగవత్ పేర్కొన్నారు.
ఆర్ఎస్ఎస్ ప్రచారకుల జీవితం, వారు చేసిన కృషికి సంబంధించిన ఓ పుస్తకావిష్కరణ సభ నాగపూర్ కేంద్రంగా జరిగింది. నాగపూర్ నాగరిక్ సహకారీ బ్యాంక్ లిమిటెడ్ ప్రధాన కార్యాలయంలో కొత్తగా నిర్మించిన సభా భవన ప్రారంభోత్సవం కూడా జరిగింది. అందులో డా. మోహన్ భాగవత్ పాల్గొన్నారు. ఈ సందర్భంగా ఆయన గత 100 ఏళ్లుగా సంఘం సాగించిన ప్రస్థానాన్ని, అలాగే ఆ సంస్థకు మరియు దేశానికి స్వయంసేవకులు అందించిన సహకారాన్ని గుర్తుచేసుకున్నారు. ఎటువంటి భౌతిక ప్రయోజనాలను ఆశించి కాకుండా, కృతజ్ఞతాభావంతో మరియు ఆప్యాయత, అనురాగాలతో చేస్తారన్నారు. ప్రచారకులు ఎటువంటి వ్యక్తిగత ప్రయోజనాలను ఆశించరని, వారి నిబద్ధత పూర్తిగా సంస్థకే అంకితమై ఉంటుందని ఆయన చెప్పారు. స్వాతంత్ర్య పోరాటంలోని వివిధ ధోరణులను గమనించిన తర్వాత, డాక్టర్ హెడ్గేవార్ వ్యక్తులను తీర్చిదిద్దే ఒక పద్ధతిగా ఆర్‌ఎస్‌ఎస్‌ను ప్రారంభించారని ఆయన వివరించారు.
ఒక ప్రచారకుడికి సంఘమే సర్వస్వం; సంఘం తప్ప అతనికి మరొకటి లేదు," అని భాగవత్అన్నారు. ప్రచారకులతో సన్నిహితంగా మెలిగే వ్యక్తులకు, వారి త్యాగగుణం మరియు వ్యక్తిత్వం కారణంగా, వారి పట్ల సహజమైన గౌరవభావం కలుగుతుందని ఆయన పేర్కొన్నారు. ప్రచారకుల అంకితభావం, నిబద్ధతలను కేవలం మాటల్లో లేదా రాతల్లో పూర్తిగా వివరించలేమని, వీటిని వ్యక్తిగత అనుభవం ద్వారానే బాగా అర్థం చేసుకోగలమని వివరించారు. అటువంటి వ్యక్తులతో నేరుగా పరిచయం ఉన్నవారు మాత్రమే వారి నిబద్ధతను పూర్తిగా గుర్తించగలరని ఆయన అన్నారు.
స్వయంసేవకుని జీవితాన్ని “ప్రవాహానికి ఎదురీదడం” వంటిదిగా అభివర్ణిస్తూ, అటువంటి జీవితంలో స్వార్థం, అహంకారం లేదా వ్యక్తిగత ఆశలు లేకుండా సూత్రాలకు కట్టుబడి ఉండటం ముఖ్యమని భగవత్ పేర్కొన్నారు. సమాజానికి ఎంత మేలు చేయగలమన్నదే ఒక స్వయంసేవకుని ప్రధాన లక్ష్యమని ఆయన చెప్పారు. అయితే, ప్రతి స్వయంసేవకుడు ఈ ఆదర్శాలను పూర్తిగా ఆచరించకపోవచ్చని, వ్యక్తుల సామర్థ్యాలు, గుణాలు మరియు నిబద్ధత స్థాయిలలో తేడాలు ఉండవచ్చని ఆయన స్పష్టం చేశారు.