ఘనంగా సంచార తెగల విద్యార్థుల ఆత్మీయ సమ్మేళనం

హైదరాబాద్‌లోని కోఠి వైఎంఐఎస్ (YMIS) భవనంలో సంచార తెగల సంక్షేమ సమితి - తెలంగాణ ఆధ్వర్యంలో నిర్వహించిన "విద్యార్థినీ - విద్యార్థుల ఆత్మీయ సమ్మేళనం" అత్యంత ఉత్సాహభరిత వాతావరణంలో ముగిసింది. ఈ విద్యా సంవత్సరంలో పదవ తరగతి, ఇంటర్మీడియట్ పరీక్షల్లో విజయవంతంగా ఉత్తీర్ణులైన సంచార తెగల విద్యార్థులను సత్కరించి, వారిని ఉన్నత చదువుల వైపు ప్రోత్సహించే సదుద్దేశంతో ఈ కార్యక్రమాన్ని ఘనంగా నిర్వహించారు.

మూలాలను విస్మరించకూడదు, నైపుణ్యాభివృద్ధిపై దృష్టి పెట్టాలి: శ్రీమతి హరిచందన (IAS)

ఆత్మన్యూనతా భావాన్ని వీడి, ఆత్మగౌరవంతో ముందుకు సాగాలి: శ్రీ అలోక్ కుమార్ (CEO, MBC Corporation)

 

విశిష్ట అతిథిగా విచ్చేసిన ఎంబీసీ (MBC) కార్పొరేషన్ సీఈఓ అలోక్ కుమార్ ప్రసంగిస్తూ, సంచార జాతుల అభ్యున్నతికి పిలుపునిచ్చారు.

"సంచార జాతుల వారు తమలోని ఆత్మన్యూనతా భావాలను విడనాడి, ఆత్మగౌరవంతో ప్రధాన సమాజంలోకి అడుగుపెట్టాలి. సంచార జాతుల వారంతా ఒకే తాటిపైకి వచ్చి సంఘటితం కావాల్సిన అవసరం ఉంది" అని ఆయన అన్నారు.దేశ రక్షణకు, ధర్మ రక్షణకు సంచార జాతులు ఎల్లప్పుడూ పెద్ద పీట వేశాయని ఆయన కొనియాడారు. ప్రభుత్వం సంచార జాతుల అభ్యున్నతి కోసం అమలు చేస్తున్న వివిధ సంక్షేమ పథకాలను, విద్యా మరియు ఉద్యోగ రంగాల్లో వారికి అందుబాటులో ఉన్న అవకాశాలను విద్యార్థులకు సవివరంగా తెలియజేశారు.

'పంచ ఫార్ములా'తో ప్రేరణ కలిగించిన రాకా సుధాకర్..

 

ప్రధాన వక్తగా పాల్గొన్న సీనియర్ జర్నలిస్ట్ రాకా సుధాకర్.. విద్యార్థులలో మనోధైర్యాన్ని, ఆత్మవిశ్వాసాన్ని పెంపొందించేలా తనదైన శైలిలో అద్భుతమైన 'పంచ ఫార్ములా'ను వివరించి వారిలో కొత్త ఉత్సాహాన్ని, ప్రేరణను నింపారు.

ఈ సభలో తెలంగాణ ప్రాంత సంచార తెగల ప్రముఖులు సిద్ది రాఘవేంద్రగారు, శంకర్ గారు, చిరంజీవిగారు, ఆర్ఎస్ఎస్ జ్యేష్ఠ ప్రచారకులు రామచంద్రయ్యగారు, చిత్తరంజన్ గారు, సంచార జాతుల మహిళా విభాగం నాయకురాలు జయమహాలక్ష్మిగారితో పాటుగా వివిధ సంఘాల నాయకులు విశేషంగా పాల్గొన్నారు.

విద్యార్థులకు సత్కారం - కాలేజీ బ్యాగుల పంపిణీ

కార్యక్రమం ముగింపులో, ఈ విద్యా సంవత్సరంలో ఉత్తీర్ణులైన విద్యార్థినీ విద్యార్థులను నిర్వాహకులు ఘనంగా సన్మానించారు. అనంతరం సభకు హాజరైన విద్యార్థులందరికీ సంస్థ తరపున కాలేజీ బ్యాగులను బహుకరించారు. ఈ ఆత్మీయ సమ్మేళనంలో సంచార తెగల సంక్షేమ సమితి ప్రతినిధులు, విద్యార్థులు, వారి తల్లిదండ్రులు విశేష సంఖ్యలో పాల్గొని కార్యక్రమాన్ని విజయవంతం చేశారు.