‘‘కల్మా’’ కంఠస్థం చేయాలి.. ప్రైవేట్ పాఠశాల హిందూ విద్యార్థికి హోంవర్క్

 

హైదరాబాద్ లోని ఓల్డ్ సిటీలోని ‘‘ది సక్సెస్ స్కూల్’’అనే ప్రైవేట్ పాఠశాలలో వివాదం రేగింది. రెండో తరగతి చదువుతున్న హిందూ విద్యార్థిని హోం వర్క్‌లో భాగంగా ‘‘కల్మా’’ నేర్చుకొని, పఠించాలని షేక్ ఆయిషా పర్వీన్ అనే టీచర్ సూచించారు. ఈ విషయం విద్యార్థి తల్లిదండ్రులకు తెలిసి పాఠశాల యాజమాన్యంపై తీవ్ర ఆగ్రహం వ్యక్తం చేశారు. ఆ పై హిందూ సంఘాలకు కూడా సమాచారం అందడంతో ‘‘ది సక్సెస్ స్కూల్’’ తీరును నిరసించారు.

 

కుటుంబీకుల సమాచారం ప్రకారం తరగతి గది ఉపాధ్యాయురాలు తమ బిడ్డకి కల్మాను కంఠస్థం చేసి, వినిపించాలని హోంవర్క్ ఇచ్చారని పేర్కొన్నారు. ఆ అసైన్‌మెంట్ గురించి తెలుసుకున్న తల్లిదండ్రులు దిగ్భ్రాంతికి గురయ్యారు, వెంటనే పాఠశాలకు వెళ్లి అధికారుల నుంచి వివరణ కోరారు. ఇది ఒకే ఒక్కసారి మాత్రమే జరిగిన ఘటన కాదని, తమ బిడ్డకు గతంలో కూడా ఇలాంటి హోంవర్క్ ఇచ్చారని వారు ఆరోపించారు.

 

ఈ సంఘటన ఏమాత్రం ఆమోద యోగ్యం కాదని, పాఠశాల యాజమాన్యంపై వెంటనే కఠిన చర్యలు తీసుకోవాలని విద్య శాఖకి కంప్లైట్ ఇచ్చింది కుటుంబం. అసలు కల్మా కంఠస్థం చేయమని హోం వర్క్ ఇవ్వడం ఏంటని ప్రశ్నిస్తున్నారు. ఈ క్రమంలో సదరు ఉపాధ్యాయురాలు షేక్ ఆయిషా పర్వీన్‌ను విధుల నుంచి తొలగిస్తున్నట్లు ‘‘ది సక్సెస్ స్కూల్’’ యాజమాన్యం ప్రకటించింది.