ఛత్తీస్ గఢ్ లో 102 కుటుంబాల ‘‘ఘర్ వాపసీ’’

 

 

ఛత్తీస్ గఢ్ లోని జైజైపూర్ అన్న గ్రామం కేంద్రంగా భారీ సంఖ్యలో ఘర్ వాపసీ కార్యక్రమం జరిగింది. శ్రీమద్ దేవీ భాగవత కథ కార్యక్రమం కేంద్రంగా 102 కుటుంబాలు తిరిగి హిందూ ధర్మంలోకి వచ్చేశాయి. ఘర్ వాపసీ ఉద్యమానికి అధ్యక్షులు, బీజేపీ ఎమ్మెల్యే ప్రబల్ ప్రతాప్ సింగ్ జుదేవ్ ఆధ్వర్యంలో ఈ కార్యక్రమం జరిగింది. జుదేవ్ వారందరికీ కాళ్లు కడిగి, సాదరంగా హిందూ ధర్మంలోకి స్వాగతించారు.

 

ఈ కార్యక్రమం ఆ ప్రాంతంలో మత మార్పిడి సమస్యపై కొత్తగా దృష్టిని ఆకర్షించింది. మతపరమైన మరియు సాంస్కృతిక అస్తిత్వాన్ని కాపాడుకోవడానికి సమాజంలో మరింత అవగాహన పెరగాలని, అందరూ కలిసికట్టుగా కృషి చేయాలని జుదేవ్ పిలుపునిచ్చారు. 'ధర్మ జాగరణ సమన్వయ', 'ధర్మ సేన', 'సేవ న్యాయ ఉత్థాన్ ఫౌండేషన్' మరియు 'దిలీప్ సింగ్ జుదేవ్ ఫౌండేషన్' సంయుక్తంగా నిర్వహించిన ఈ సమావేశంలో మత పెద్దలు, సామాజిక ప్రతినిధులు, మహిళా సంఘాలు మరియు స్థానిక కార్యకర్తలు పాల్గొన్నారు.

 

సామాజిక సేవ ముసుగులో కొన్ని మత మార్పిడి కార్యకలాపాలు జరుగుతున్నాయని జుదేవ్ ఆరోపించారు. ఇటువంటి పద్ధతులు బలహీన వర్గాల సాంస్కృతిక గుర్తింపును దెబ్బతీస్తాయని ఆయన హెచ్చరించారు. బలవంతపు లేదా తప్పుదోవ పట్టించే మత మార్పిడులుగా ఆయన అభివర్ణించారు. వాటిని నివారించడానికి ప్రజలు అప్రమత్తంగా ఉండాలని, సామూహిక ప్రయత్నాలు చేయాలని ఆయన పిలుపునిచ్చారు.

 

సనాతనం భారతదేశపు ఆత్మ; దాని అస్తిత్వంపై జరిగే ఏ దాడిని కూడా సహించబోం" అని జుదేవ్ పేర్కొంటూ, 'ఘర్ వాపసీ' పట్ల తన నిబద్ధతను పునరుద్ఘాటించారు. ప్రజలను వారి పూర్వీకుల విశ్వాసంతో, సాంస్కృతిక సంప్రదాయాలతో తిరిగి అనుసంధానించడమే ఈ కార్యక్రమం యొక్క ప్రధాన ఉద్దేశమని ఆయన స్పష్టం చేశారు.మహిషాసురమర్దిని రూపంలో ఉన్న మా దుర్గాదేవిని ఆవాహన చేస్తూ, సనాతన సంప్రదాయాలను పరిరక్షించడంలోనూ, సామాజిక ఐక్యతను కాపాడటంలోనూ ఐక్యంగా ఉండాలని జుదేవ్ మహిళలకు, సమాజ సభ్యులకు విజ్ఞప్తి చేశారు. శక్తి జిల్లాను మత మార్పిడుల రహితంగా మార్చడానికి సామూహిక ప్రతిజ్ఞ చేయాలని కూడా ఆయన పిలుపునిచ్చారు.

 

ఇక.. ఆచార్య రాకేశ్ జీ, స్వామి శ్రద్ధానంద, స్వామి లక్ష్మణానంద, అశోక్ సింఘాల్ కి నివాళులు అర్పించారు. ఈ సందర్భంగా రాకేశ్ జీ మాట్లాడుతూ సనాతన ధర్మ పరిరక్షణకు వీరు విశేషంగా కృషి చేశారని కొనియాడారు.మతపరమైన సంప్రదాయాలను కాపాడేందుకు కట్టుబడి ఉండాలని ఆయన సమాజానికి పిలుపునిచ్చారు.ధర్మ జాగరణ సమన్వయ మహిళా విభాగం ప్రాంతీయ సమన్వయకర్త అంజు గాబెల్, మహిళలందరూ ఈ ప్రచారానికి మద్దతుగా ఏకం కావాలని, శక్తి జిల్లాను మత మార్పిడులు లేని జిల్లాగా మారుస్తామని ప్రతిజ్ఞ చేయాలని పిలుపునిచ్చారు.

 

ఈ కార్యక్రమంలో పాల్గొన్న 102 కుటుంబాలు, సనాతన ధర్మంతో మరియు తమ పూర్వీకుల సమాజంతో తిరిగి అనుసంధానం కావడం పట్ల సంతోషాన్ని వ్యక్తం చేశాయని నిర్వాహకులు తెలిపారు. ఈ సందర్భంగా 'ధర్మ సేన' ఒక మోటార్‌సైకిల్ ర్యాలీని కూడా నిర్వహించింది; ఇందులో పాల్గొన్న వారు "జై శ్రీరామ్" అని నినాదాలు చేశారు.