సముద్ర గర్భంలో ప్లాస్టిక్ సునామీ: మూల్యం చెల్లిస్తున్న జీవకోటి

 

 

సముద్ర గర్భం నేడు మానవ నిర్లక్ష్యానికి నిలువుటద్దంగా మారుతోంది. ఆధునిక మానవ జీవనశైలిలో భాగమైన ప్లాస్టిక్, ప్రకృతి ప్రసాదించిన అపార జలనిధిని శ్మశానంగా మారుస్తోంది. ఒకప్పుడు జీవకోటికి నిలయంగా, భూమికి ఊపిరిగా నిలిచిన సముద్రాలు.. నేడు ప్లాస్టిక్ వ్యర్థాల చెత్తకుండీలుగా రూపాంతరం చెందుతున్నాయి. కంటికి కనిపించే పెద్ద పెద్ద ప్లాస్టిక్ సీసాల నుండి కంటికి కనిపించని మైక్రోప్లాస్టిక్స్ వరకు ప్రతి ఒక్కటి సముద్ర పర్యావరణ వ్యవస్థను కోలుకోలేని దెబ్బతీస్తున్నాయి. ఈ నిశ్శబ్ద విపత్తు సముద్ర జీవులనే కాకుండా, అంతిమంగా మానవ మనుగడను కూడా ప్రమాదంలోకి నెడుతోంది.ప్రపంచవ్యాప్తంగా ప్రతి సంవత్సరం సముద్రాల్లోకి చేరుతున్న ప్లాస్టిక్ వ్యర్థాల పరిమాణం విస్మయం కలిగిస్తోంది. వివిధ అంతర్జాతీయ పర్యావరణ పరిశోధనల ప్రకారం, ఏటా సుమారు 8 మిలియన్ల నుండి 12 మిలియన్ టన్నుల ప్లాస్టిక్ వ్యర్థాలు సముద్ర గర్భంలో కలుస్తున్నాయి

 

దీనిని సులభంగా అర్థం చేసుకోవాలంటే, ప్రతి నిమిషానికి ఒక పూర్తి గార్బేజ్ ట్రక్కు (చెత్త లారీ) ప్లాస్టిక్‌ను సముద్రంలో కుమ్మరిస్తున్నంత వినాశనం జరుగుతోంది. ప్రస్తుతం సముద్రాలలో దాదాపు 150 మిలియన్ టన్నుల ప్లాస్టిక్ పేరుకుపోయి ఉంటుందని అంచనా. ఒకవేళ ఇదే పరిస్థితి గనుక రాబోయే రోజుల్లోనూ ఇలాగే కొనసాగితే, 2050 నాటికి సముద్రాలలో చేపల బరువు కంటే ప్లాస్టిక్ వ్యర్థాల బరువే ఎక్కువగా ఉంటుందని శాస్త్రవేత్తలు హెచ్చరిస్తున్నారు.ఈ వ్యర్థాలు సముద్ర పర్యావరణాన్ని అత్యంత దారుణంగా ప్రభావితం చేస్తున్నాయి. సముద్ర ఉపరితలంపై తేలియాడే ప్లాస్టిక్ సంచులను తాబేళ్లు జెల్లీఫిష్‌లుగా భ్రమించి ఆహారంగా తీసుకుంటున్నాయి. దీనివల్ల వాటి జీర్ణవ్యవస్థ స్తంభించి ఆకలితో అలమటించి చనిపోతున్నాయి. తిమింగలాలు, సీల్స్ వంటి పెద్ద జీవులు ప్లాస్టిక్ జాలరి వలలలో, తాడులలో చిక్కుకుని ఈదలేక, ఊపిరి ఆడక ప్రాణాలు విడుస్తున్నాయి. ప్లాస్టిక్ సంచులు సముద్రపు అడుగున ఉండే పగడపు దిబ్బలపై పేరుకుపోవడం వల్ల వాటికి సూర్యరశ్మి, ఆక్సిజన్ అందక అవి నశించిపోతున్నాయి.

 

పగడపు దిబ్బల నాశనం అంటే సముద్ర జీవుల నర్సరీలు నాశనమవడమే.మరీ ముఖ్యంగా, సముద్రంలో చేరిన ప్లాస్టిక్ సూర్యరశ్మి, అలల ఒరిపిడి కారణంగా కాలక్రమేణా విచ్ఛిన్నమై ఐదు మిల్లీమీటర్ల కంటే తక్కువ పరిమాణంలో ఉండే 'మైక్రోప్లాస్టిక్స్'గా మారుతుంది. ఈ మైక్రోప్లాస్టిక్స్ సముద్రపు నీటిలో ఉండే రసాయనాలను, విషపదార్థాలను అయస్కాంతంలా ఆకర్షిస్తాయి. వీటిని చిన్న చిన్న చేపలు, రొయ్యలు ఆహారంగా తీసుకుంటాయి. ఆ చిన్న చేపలను పెద్ద చేపలు తింటాయి. అలా ఈ ప్లాస్టిక్ విషం సముద్ర ఆహార గొలుసు (Food Chain) అంతటా విస్తరిస్తుంది. చివరికి ఆ చేపలను ఆహారంగా తీసుకునే మనుషుల శరీరాల్లోకి కూడా ఈ ప్లాస్టిక్ రసాయనాలు చేరుతున్నాయి. తద్వారా క్యాన్సర్, హార్మోన్ల అసమతుల్యత, రోగనిరోధక శక్తి తగ్గడం వంటి తీవ్రమైన ఆరోగ్య సమస్యలు తలెత్తుతున్నాయి. సముద్రంలో ప్లాస్టిక్ కాలుష్యం అనేది కేవలం పర్యావరణ సమస్య మాత్రమే కాదు, అది భూగోళంపై ఉన్న యావత్ జీవకోటి ఉనికికి సంబంధించిన అతిపెద్ద సవాలు.